أنا مين ؟! كثير مننا بيسأل نفسه السؤال ده. في ناس محظوظة بتقدر تفهم نفسها بسرعه، وناس لأ..!!

طبعا غلط

مفيش حاجه إسمها محظوظ وقدر يفهم نفسه بسرعة. عشان تفهم نفسك لازم تعرف أصلا يعني إيه نفسك.

 وده اللي هتعرفه معايا دلوقت وكمان هخليك تعرف تطور نفسك عشان تكون شخصية أقوي وإيجابية و تغير حياتك للأفضل.

الذات

• لها تعريفات كثير وفي منها التعريف العلمي، وتعريف نفسي وتعريف فلسفي، بس خلينا هنا نعرفها حسب إجماع العلماء عليها إنها إجابه سؤال... من أنت؟!
• يعني هي مجموعة الأنظمة الإجتماعية والنفسية والعصبية المرتبطة ببعضها. وبما إن الذات هي سلوك الفرد، فهي تعتمد على العوامل الفطرية المكتسبة + توقعات الأخرين ... يعني الآخرين شايفينا إزاي.
• وكمان نقدر نقول إنها إتحاد مجموعة من العناصر زي الجسم + العواطف + الأفكار + الأحاسيس.
• والذات هي ميزة كل شخص وتعبر عن هويته، بمعنى أدق وأوضح هي جزء من شخصيتك.

وبعد ما عرفنا يعني إيه ذات، وقبل ما نتكلم عن الخطوات اللي هتغير بها حياتك وتكون شخص أكثر إيجابية وناجح خليني اكلمك الأول عن الناس اللي بتشكل الذهب.

تفتكر الناس دي بتشكل الذهب أمتى؟ اهاا.. صح.. سمعتك. وهو لين... صح. وده طبعا لسهوله تشكيله ما فيش حد عاقل هيستنى لما الذهب يجمد ويبدأ يشكله ده هيبقي مجهود على الفاضي.

هتقول لي تقصدي إيه؟ وليه بتتكلمي عن الذهب دلوقت!!

أفهمك..... شخصيتك زي المعادن -مش بيقولوا الناس معادن- يعني وأنت صغير سهل جدا تشكيلك ومع الوقت بتكون شخصيتك بتاخذ شكل أجمد وأقوى... يعني باختصار اللي اتعودت عليه واتعلمته بيبقى خلاص ده شخصيتك.

 طيب كده إيه.. خلاص مش هنفع...

 ‏ لأ طبعا... طيب اتصرف ازاي؟

 ‏هأقول لك حل سحري سهل جداً.

 ‏ زي ما الذهب بيجمد و عشان نقدر نشكله لازم نسيحه من تاني فلازم برضو علشان تقدر تغير في شخصيتك اللي اتشكلت تكون مرن. الحل السحري لك هو (المرونه) لازم تتعلم تكون مرن.

 ‏هتقول لي حاضر هابقى مرن واتقبل فكرة إني محتاج أتعلم حاجات جديدة واتقبل النقد.

 ‏هاقول لك تمام... أنت كده على الطريق الصح 

 ‏و تعال نشوف أهم صفات الشخصية الإيجابية الناجحة:

 ‏ (1) أبعد عن الاعذار: 

الناس القوية مش بتدور على أعذار، العذر هو كذب على النفس وبدل ده الأفضل لك إنك تنخرط في التفكير والتأمل والتخطيط عشان تحسن من نفسك.

(2) القلق:

أبعد عن القلق والخوف لو خفت من حاجه يبقى لازم تأخذ فعل محدد عشان تقضي على التوتر ده، الناس القوية بتتعامل مع القلق بحجمه الطبيعى و بيفكروا إيه المفروض نعمله دلوقت بدون عواطف علشان يتخلصوا من القلق ده. لو سبته يتمكن منك هيعدي لمرحلة التوتر السلبي وهنا يكون القلق مدمر وصعب التعامل معاه.

(3) كون مستقل:

الشخصيه القوية ما بتكونش اعتمادية، دائما بيعتمد على نفسه ومش بيبقى إتكالي.

(4) لا تبحث عن الاستحسان:

عشان تكون إنسان إيجابي، ما تدورش على التقدير من حد... أنت لازم تكون راضي عن نفسك ما بتدورش على الاستحسان من حد. لأن الاستحسان الحقيقي بيكون داخلي أما استحسان الآخرين مش بيبقى حقيقي وممكن يتهد في لحظه ما ينفعش تربط نفسك به.

(5) تقبل الواقع:

يعني باختصار تحاول تتقبل نفسك زي ما أنت. مش مطلوب منك أن أنت تكون نجم أو مشهور علشان تعجب الناس أو علشان ترضى عن نفسك أنت حلو زي ما أنت.

(6) أبعد عن المعارك الغير المهمة:

ما تحاربش في معركة مش بتاعتك، وإلا هتبقى زي اللي بيحارب طواحين الهواء، وفر مجهودك هتحتاجه بعدين.

(7) تجنب توقعات الأخرين:

يعني خليك نفسك، ما تفكرش في إنك لازم تكون زي ما متوقع لك تكون من وجهة نظر الاخرين،لو فكرت بالطريقة دي هتلاقي نفسك دائما محبوس في وجهة نظر الناس ومش هيبقى عندك مساحة إنك تبدع علشان تثبت نفسك وتشوف امكانياتك.

(8) أهتم بصورة ذاتك:

دائما أهتم بصورة ذاتك وحاول تحسن منها وتنميها، علشان ذاتك هي سقف طموحاتك اللي بتوصلك للي نفسك تحققه، تنمية ذاتك هي وسيلتك للنجاح.

(9) التعامل بشكل حاسم:

الناس لها 3 أنماط ...

*النمط العدائي... وده الإنسان اللي بيعبر عن مشاعره دائما على حساب الآخرين، بيقى شايف نفسه أهم من الاخرين.

*النمط السلبي... وده عكس العدائي تماما. دايما حاسين بقوة خارجية مسيطرة عليهم، تفكيرهم سلبي تجاه نفسهم وبيشوفوا إحتياج الأخرين أهم من نفسهم.

*‏النمط الحاسم... وده نمط الشخصية القوية، بيحترم حقوقه وحقوق الأخرين. بيبقى عنده مسئولية تجاه ذاته وبيتقبل عواقب أفعاله و بيكون عارف حقوقه ويدافع عنها وكمان بيقدم واجباته تجاه الأخرين. صاحب قناعه إنه له حقوق وعليه واجبات.

(10) التعامل مع النقد:

الانسان الناجح يتقبل النقد وخصوصا لو كان نقد إيجابي لأنه بيستفاد منه أما لو كان نقد بشكل سلبي فبيشوف نوع النقد ده وليه الشخص ده بينتقده كده، ممكن يكون غيران منه أو بيحقد عليه أو حاسس بالظلم من ناحيته ووقتها لازم يتعامل مع الشخص ده بذكاء.

وبكده أكون جمعت لك أهم 10 نقاط للشخصية الناجحة الإيجابية القوية. الدور عليك دلوقت تقول لي فيك منهم كم صفة وإيه الصفات اللي تحب تكتسبها في شخصيتك علشان تطور من نفسك.