بدائل هتغير حياتك

عادات كثير بنعملها لمجرد إنها بقت عادة، ومش شرط تكون إفادة، طيب ما أنت ممكن تغير العادة دي بعادة تانية مفيدة أكتر. تعال أقول لك حاجات في حياتك بتعملها وهي ممكن تكون بتضرك وأنت مش حاسس وأقول لك كمان تستبدلها بإيه.

١) استبدل وقت الفراغ بأعمال تطوعية.

لو عندك وقت فراغ كبير وبتحس بالملل كثير يبقى أفضل حل لك هو إنك تتطوع في جمعية خيرية غير هادفة للربح. الجمعية دي مش بس هتقضي على الملل عندك، دي كمان هتكتسب منها خبرات ومعارف أكيد هتكون إفاده لك في حياتك. ده غير الثواب طبعاً اللي ممكن بسببه ربنا يفتح عليك من أبواب الرزق الكتير. 

٢) استبدل شبكات التواصل الإجتماعي بكتاب.

حتى لو مش بتحب القراءة، ممكن تسمع فيديو مفيد. أما لو كنت من الناس اللي بتحب القراءة فأحب أقول لك إنك ممكن تكتسب علوم وخبرات كثيرة من قراءتك دي. الكتب هي خُلاصة خبرات وأفكار ناس تعبت في حياتها علشان توصل لك علمها ده.... إستغله.

٣) استبدل قهوتك الصباحية بكوب من الماء الدافئ

طبعا معظم الناس لازم تبدأ يومها بفنجان قهوة أو شاي أو نسكافية. العادة دي مش لطيفة الحقيقة، وخصوصاً لو سألت معدتك. معدتك لو بتعرف تتكلم هتقول لك قد إيه ممكن تكون العادة دي بتتعبها وتسببلها مشاكل وتخلي عملية الهضم مش مريحة، وبالتالي تبدأ تتراكم المشاكل المختلفة. زي القولون، الغازات، والإسهال، وغيرها...

 طيب ليه من الأول، ممكن تستبدل العادة دي بشرب ماء دافئ، ويفضل يكون عليه معلقة عسل نحل أو عصير ليمون، ده مفيد جداً. وبعدها ممكن تستمتع بكوب القهوة أو النسكافية بتاعتك.

٤) استبدل السوبر ماركت بالهايبر ماركت.

طبعا كلنا عارفين أن غالباً البياع اللي تحت البيت سعره أغلى من أي حد تاني، علشان كده أنا باقترح عليك أن أنت تعمل التسوق بتاعك من الهايبر ماركت. الهايبر ماركت مش بس فيه السلع كتير ومتنوعة؛ يعني اي حاجة هتعوزها تلاقيها، كمان الحاجة بتبقى فريش، ده غير أن طريقة حفظه للسلع بتحافظ عليها، كمان هتلاقي عنده عروض كثير والعروض دي أكيد هتوفر لك فلوس.

٥) استبدل الدروس الخصوصية بالقنوات التعليمية.

طبعا أنت ك أب أو أم تعبان جداً من موضوع الدروس الخصوصية اللي بيستهلك منك فلوس كتير. ده غير قلقك على ابنك او بنتك وهم رايحين وهم راجعين من الدروس أنا ممكن اخليك تستبدلها بحاجات تانية بتوفر أكتر وأمان أكتر.. زي 

▪️ القنوات التعليمية الفضائية 

 القنوات دي وزارة التربية والتعليم بتوفرها علشان تساعدك وتخفف عنك عبء الدروس، كمان بتقدم لك شرح كويس جداً.

  ▪️ قنوات اليوتيوب 

اللي عاملينها بيبقوا مدرسين ودايماً بيشرحوا كويس؛ لأن يهمهم جداً أن هم يعملوا مشاهدات ويزودوا المتابعين لأن ده بيكون مكسب لهم فكدة الطرفين بيبقوا كسبانين أنت كسبان الشرح وهم كسبانين المتابعين.

▪️ التطبيقات

التطبيقات التعليمية اللي ممكن تلاقيها في متجر الألعاب للأندرويد، بتكون مفيدة جداً، التطبيقات دي بتقدم لأولادك شرح طول السنه وبتقسمهم لمجموعات وكل مجموعة بيتابعها عدد من المدرسين. في منها مجاني وحتى اللي بيبقى منها مدفوع بيكون بأجر رمزي.

وبكده أكون جمعت لك كام نقطه أعتقد أن هم هيغيروا في حياتك كتير. لو بدأت تطبقهم فياريت تحاول تطور من نفسك وتبتدي تتغير من دلوقت.